Euskal Encounter 25 arrakasta handiz amaitu da gaur. Euskaltel Konekta fundazioaren arduradun eta informatika-bilkuraren koordinatzaile nagusi Sabino San Vicentek “inoiz egin den party borobilena” dela adierazi du. Datuek horrela diote, lau egunetan zehar segundoko 40 Gb-eko abiaduran nabigatu duten 8.000 kideek parte-hartze maila handia izan baitute topaketaren arlo guztietan. Publiko ugari bildu da, gainera, 50 prestakuntza-jardueren inguruan zein antolatutako lehiaketetan.

Euskal Encounterrek errealitate birtualaren guneari leku garrantzitsua eskaini dio aurten. Bisitariek teknologia honen aurrerapenekin gozatu dute ezarritako hamar bat postuetan. Horietako batzuek esperientzia erabat murgilgarria eskaintzen zuten, eta inpaktu sentsorial handia eragiteagatik harridura handia sortu dute enpresa eta marka ezberdinetako berrikuntzak probatu dituzten pertsonen artean. Izan ere, jokalariek euren trebetasuna eta gaitasun fisikoak erabili behar izan dituzte proposatutako egitekoak burutzeko.

Euskal Encounterren dauden segurtasun informatikoko adituek ransomware kasuak iaztik bost bider hazi direla nabarmendu dute. Birus mota honek ordenagailuaren informazioa enkriptatzen du, eta erasotzaileek ordainketa eskatzen du erreskatearen truke. Prestakuntzaren eta prebentzioaren garrantzia azpimarratu ondoren, eskatutako diru-ordainketa ez egitea aholkatu dute, eta erasoa zabaltzea ekiditeko ordenagailua lehenbailehen saretik deskonektatzea gomendatu dute. Era berean, salaketa jartzea eta zibersegurtasunean aditua den profesional batekin kontaktuan jartzea aholkatu dute.

IK4-IKERLAN enpresako Ángel Conde Manjónek denbora errealeko analisia nola egin azaldu du Euskal Encounterrean emandako hitzaldi batean. Live demo baten bitartez, “Big Data” Spark analitiken motorra erabili du tamaina izugarri handiarengatik maneiatzen oso zailak diren datuak kudeatu ahal izateko.

Bideo-jokoek arazo sozialak jorratu beharko al lituzkete? Galdera honi erantzun dio Square Enix enpresako diseinatzaile Alejandro Arquek Euskal Encounterren eskainitako hitzaldian. Hiru milioi jokalari dituen 'Life Is Strange' jokoaren diseinatzaile-taldean dagoen profesional honek bideo-jokoen industrian gizarte-arazoak sentsibilitatearekin eta era errealean landu daitezkeela defendatu du, baita joko hauek “jokalariak sentsibilizatzeko ahalmena” dutela ere, “interaktibitateak bestearen azalean jartzea” ahalbidetzen duelako.